फलटण (सातारा) : साताऱ्याच्या फलटणमधील एका महिला डॉक्टरने आत्महत्या केल्याने खळबळ उडाली आहे. तळहातावरच लिहिलेल्या सुसाईड नोटमध्ये या महिलेनं एका पोलीस कर्मचाऱ्यासह आणखी एका व्यक्तीवर गंभीर आरोप केले आहेत.
या सुसाईड नोटमध्ये तिने पोलीस अधिकाऱ्यांसह आणखी एका व्यक्तीवर लैंगिक छळाचे आरोप केले आहेत.
या प्रकरणामुळं सातारा जिल्ह्यात खळबळ माजली असून या प्रकरणाचा तपास पोलिसांकडून केला जात आहे.
दरम्यान, आरोपी फरार असून त्यांच्यावर गुन्हे दाखल झाल्याची माहिती पोलिसांनी दिली आहे.
नेमकं काय घडलंय?
या महिला डॉक्टरने काल गुरुवारी (23 ऑक्टोबर) फलटणमधील 'मधुदीप' नावाच्या हॉटेलमध्ये जाऊन आत्महत्या केली.
तिने हातावर लिहिलेल्या सुसाईड नोटमध्ये एका पोलीस अधिकाऱ्याचं तसेच आणखी एका व्यक्तीचं नाव लिहिलं आहे.
त्यातील एका पोलीस अधिकाऱ्याने आपल्यावर चारवेळा बलात्कार केला, तर दुसऱ्या व्यक्तीने आपला शारिरीक आणि मानसिक छळ केला असल्याचा आरोप या महिला डॉक्टरनं केला आहे.
या महिला डॉक्टरवर चुकीचे पोस्टरमार्टम रिपोर्ट्स बनवण्यासाठी राजकीय तसेच पोलिसांकडूनही प्रचंड दबाव असायचा, अशी माहिती तिच्या भावाने दिली आहे.
तिला अशा खोट्या रिपोर्ट्ससाठी खासदाराच्या पीएंकडूनही फोन यायचा, असाही आरोप तिच्या नातेवाईकांनी केला आहे.
यासंदर्भात माध्यमांशी बोलताना तिच्या भावाने म्हटलं की, "मागील वर्षभरापासून तिला चुकीचे पोस्टमार्टम रिपोर्ट बनवण्यासाठी राजकीय तसेच पोलीसांचं खूप प्रेशर असायचं. ती तिच्या बहिणीला यासंदर्भात वारंवार सांगायची.
परंतु, तिच्यावर एवढा दबाव असेल, असं वाटलं नव्हतं. परंतु, शेवटी त्या त्रासाला कंटाळून आणि तिला ते सहन न झाल्याने तिने काल आत्महत्या केली आहे."
पुढे त्यांनी म्हटलंय की, "ज्या पोलीस अधिकाऱ्याचा तिला त्रास होत होता, त्यांचीही नावे तिने हातावर लिहिली आहेत. तसेच, यासंदर्भात तक्रार करण्यासाठी मागील दोन वर्षांपासून तिने डिवायएसपी आणि एसपींना लेटर्सही लिहिले आहेत.
त्यांची आवक-जावक नोंदही झालेली आहे. परंतु, तिच्या तक्रारीवर कोणतीही कारवाई आजवर झालेली नाही. तसेच, काही माहिती मिळवण्यासाठी तिने आरटीआयही टाकला होता, त्यावरही तिला काही प्रतिसाद मिळाला नाही."
दोन्हीही आरोपी फरार, दोघांवरही गुन्हा दाखल
ज्या दोन व्यक्तींची नावे या पीडित महिला डॉक्टरने आपल्या सुसाईड नोटमध्ये लिहिली आहेत, ते दोघेही सध्या फरार आहेत. त्यामुळं त्यांच्याशी संपर्क होऊ शकलेला नाही.
यातील ज्या पोलीस अधिकाऱ्यावर चारवेळा बलात्कार करण्याचा आरोप पीडित महिला डॉक्टरने केला आहे, त्याला निलंबित करण्यात आलं आहे, अशी माहिती पोलीस अधीक्षक तुषार दोषी यांनी दिली आहे.
सध्या दोन्हीही आरोपींवर गुन्हा दाखल करण्यात आला असून त्यांचा शोध सुरू आहे, अशी माहिती पोलिसांनी दिली आहे.
पोलीस अधीक्षक तुषार दोषी यांनी माध्यमांशी बोलताना म्हटलं की, "या प्रकरणी शुक्रवारी सकाळी गुन्हा दाखल झाला आहे. या महिला डॉक्टरने स्वत:च्या हातावर दोन नावे लिहून ठेवली आहेत. त्यात फलटण ग्रामीणचे पीएसआय आणि एका नागरिकाचा उल्लेख केला आहे.
या महिला डॉक्टरने शारीरिक आणि मानसिक छळाचा तसेच बलात्कार केल्याचा आरोप केला आहे. त्यामुळे मी आत्महत्या करत आहे, असंही लिहिल्यामुळे गुन्हा दाखल करण्यात आला आहे.
बलात्कार आणि आत्महत्येस प्रवृत्त करणं अशा दोन कलमांखाली हा गुन्हा नोंद आहे. आरोपींना पकडण्याकरता पथक रवाना करण्यात आलेलं आहे. पीएसआयवर गुन्हा दाखल झाल्याने त्यांना तत्काळ सस्पेंड करण्यात आलं आहे."
'आम्ही सांगू तसा रिपोर्ट आम्हाला द्यावा, यासाठी दबाव टाकला जातोय', अशी तक्रार या महिला डॉक्टरने केली होती का? या प्रश्नावर पोलिसांनी म्हटलं की, "त्यांनी तत्कालीन एसडीपीओंकडे पोलिसांविरोधात तक्रार दाखल केली होती आणि पोलिसांनी त्यांच्याविरोधात जिल्हा शल्य चिकित्सकांकडे तक्रार केली होती. अशा दोन्ही परस्पर एकमेकांविरोधात तक्रारी झालेल्या आहेत.
या महिला डॉक्टरवर खासदारांच्या पीएकडूनही दबाव टाकला जात होता, असा आरोप नातेवाईकांकडून केला जातोय.
तर राजकीय दबावाच्या दृष्टीनेही तपास होतोय का? या प्रश्नावर पोलीस अधीक्षक तुषार दोषी म्हणाले की, "सध्या तर एक अनैसर्गिक मृत्यू झालेला दिसतोय. प्रथमदर्शनी ती आत्महत्या दिसते आहे.
ती आत्महत्याच आहे, हे आधी सिद्ध करावं लागेल. त्याच्यानंतर आत्महत्येचं कारण काय, हे शोधावं लागेल. त्यामध्ये महिलेनं काय लिहिलंय, कुणासोबत आधी काय बोलणं झालंय, या सगळ्याचा तपास होणार."
'तक्रार करूनही दखल घेतली गेली नाही'
या महिला डॉक्टरने आपल्याला होत असलेल्या त्रासाबाबत वारंवार लिखित आणि रितसर तक्रारी केल्या होत्या. तरीही तिच्या तक्रारीची दखल घेण्यात आली नाही, अशी माहिती तिच्या काकांनी तसेच भावानेही माध्यमांशी बोलताना दिली आहे.
या महिला डॉक्टरने 19 जून 2025 रोजी फलटणच्या पोलीस उपअधीक्षकांना रितसर पत्र लिहून तक्रार केली होती.
या पत्रामध्ये या महिलेने लिहिलं की, "पेशंट (आरोपी) फीट नसतानाही तो फीट आहे, असा रिपोर्ट द्या, असा वारंवार दबाव माझ्यावर टाकतात आणि अपशब्दही वापरतात. यासंदर्भात मी पोलीस निरिक्षक यांना फोनद्वारे माहिती दिली असतान त्यांनी 'त्यामध्ये माझा काही संबंध नाही' असं म्हणत उडवाउडवीची उत्तरं दिली," असाही आरोप तिने या तक्रारीमध्ये केला होता.
या तक्रारीची कोणतीच दखल न घेतली गेल्याने महिला डॉक्टरने 13 ऑगस्ट रोजी माहिती अधिकारांतर्गत आरटीआय देखील दाखल केला होता.
आपल्या तक्रारीचं पुढे काय झालं, याबाबतची माहिती घेण्याचा प्रयत्न या आरटीआयद्वारे महिला डॉक्टरने केला होता.
पण त्या आरटीआयलाही काही उत्तर प्राप्त झालं नसल्याचं या महिलेच्या भावाने सांगितलं आहे.
त्यानंतर आणखी एका पत्रात या महिलेने पुन्हा सविस्तर वर्णन करत आपल्या तक्रारी मांडल्या होत्या.
महिलेच्या तक्रारीची दखल का घेतली गेली नाही? - सुप्रिया सुळे
राष्ट्रवादी काँग्रेस (शरदचंद्र पवार) पक्षाच्या खासदार सुप्रिया सुळे यांनी यासंदर्भात पोस्ट करत म्हटलंय की, "महिला डॉक्टरचे आत्महत्या प्रकरण अतिशय गंभीर आहे.
या महिलेने लिहिलेल्या सुसाईड नोटमध्ये तिने गेली काही दिवसांपासून तिचा शारिरीक आणि मानसिक छळ होत असल्याचे वरीष्ठांना वारंवार कळविले होते. परंतु तिच्या तक्रारीची दखल घेतली गेली नाही. अखेर तिने टोकाचे पाऊल उचलले."
या विषयाच्या मूळाशी नेमके कोणते कारण आहे? या महिलेच्या तक्रारीची दखल का घेतली गेली नाही? या सर्व प्रश्नांची उत्तरे मिळाली पाहिजेत, असंही त्यांनी म्हटलेलं आहे.
राज्य महिला आयोगाच्या प्रमुख रुपाली चाकणकर यांनी यासंदर्भात माहिती देणारा एक व्हीडिओ पोस्ट केला असून त्यांनी म्हटलंय की, "राज्य महिला आयोगाने याची दखल घेतली आहे. सद्यस्थितीत याप्रकरणी फलटण सिटी पोलीसमध्ये भारतीय न्याय संहितेच्या कलम 64 (2), 108 प्रमाणे गुन्हा दाखल केला आहे. फरार आरोपींना अटक करण्यासाठी शोधपथक रवाना करण्यात आले आहे."
"पीडित महिलेने याआधी त्यांना होणाऱ्या त्रासाबाबत तक्रार केली असल्यास त्यांना मदत का मिळाली नाही याचीही चौकशी व्हावी आणि संबंधितांवर कठोर कारवाई करावी अशा सूचना आयोगाने पोलिसांना दिल्या आहेत," असंही त्यांनी म्हटलेलं आहे.
न्यूज मराठी लाईव्ह
सातारा
टिप्पणी पोस्ट करा